ಕನ್ನಡ ಭಾರತಿ ಜಾಗೃತಿ ಆಂದೋಲನ

ಏಳನೇ ತರಗತಿಯಲ್ಲಿ ಕಲಿಯುತ್ತಿರುವ ‘ಭಾರತಿ’ ಎಂಬ ಪುಟ್ಟ ಬಾಲಕಿ, ತನ್ನ ಹಳ್ಳಿಯಲ್ಲಿರುವ ಅಕ್ಷರ ಬಾರದ ಎಲ್ಲರಿಗೂ ಕನ್ನಡ ಓದಲು ಮತ್ತು ಬರೆಯಲು ಕಲಿಸುವ ದೃಢ ಸಂಕಲ್ಪ ಮಾಡುತ್ತಾಳೆ. ಅವಳ ಈ ನಿಸ್ವಾರ್ಥ ಸೇವೆ ಹಾಗೂ ಛಲವೇ ‘ಭಾರತಿ ಟೀಚರ್’ ಕಥಾವಸ್ತು.

ಈ ಕಥೆಯಿಂದ ಪ್ರೇರಿತಗೊಂಡು ರಾಜ್ಯಾದ್ಯಂತ ಕನ್ನಡ ಶಾಲೆಗಳಲ್ಲಿ ಕಲಿಯುತ್ತಿರುವ ಲಕ್ಷಾಂತರ ವಿದ್ಯಾರ್ಥಿಗಳಲ್ಲಿ ಹೊಸ ಚೈತನ್ಯ ಮೂಡಿಸುವುದು ಕನ್ನಡ ಭಾರತಿಯ ಆಶಯ. ಪ್ರತಿಯೊಬ್ಬ ಕನ್ನಡ ಬಲ್ಲ ವಿದ್ಯಾರ್ಥಿಯೂ ತನ್ನ ಸುತ್ತಮುತ್ತಲಿನ ಕನಿಷ್ಠ 10 ಜನರಿಗೆ ಕನ್ನಡ ಕಲಿಸುವ ‘ವಿದ್ಯಾದಾನಿ’ಯಾಗಲು ಮುಂದೆ ಬರುತ್ತಿದ್ದಾನೆ.

ಕನ್ನಡ ನಾಡಿನಲ್ಲಿ ಭಾಷೆಯ ಜಾಗೃತಿಗಾಗಿ 1890 ನೇ ಇಸವಿಯಲ್ಲಿಯೇ ಧಾರವಾಡದಲ್ಲಿ ಕರ್ನಾಟಕ ವಿದ್ಯಾವರ್ಧಕ ಸಂಘ ಸ್ಥಾಪನೆಯಾಗಿ ಭಾಷೆಯ ಉಳಿವು ಮತ್ತು ಏಕೀಕರಣಕ್ಕಾಗಿ ಮುನ್ನುಡಿ ಬರೆಯಲಾಯಿತು. ತದನಂತರ ಸಾಹಿತ್ಯ ಪರಿಷತ್ತು, ಗೋಕಾಕ್ ಚಳುವಳಿ, ಕನ್ನಡ ಅಭಿವೃದ್ಧಿ ಪ್ರಾಧಿಕಾರ ಹಾಗೂ ಗಡಿ ಆಯೋಗಗಳ ಮೂಲಕ ಹಲವಾರು ಮಹತ್ತರ ಹೆಜ್ಜೆಗಳು ಮೂಡಿಬಂದವು.

ಆದರೆ ಪ್ರಸ್ತುತ ಜಾಗತೀಕರಣ ಹಾಗೂ ಆಂಗ್ಲ ಮಾಧ್ಯಮಗಳ ಅತಿಯಾದ ಪ್ರಭಾವದಿಂದಾಗಿ ಕನ್ನಡ ಮಾಧ್ಯಮ ಶಾಲೆಗಳ ಸಂಖ್ಯೆ ಕ್ಷೀಣಿಸುತ್ತಿದೆ. ಹೊರರಾಜ್ಯಗಳಿಂದ ಲಕ್ಷಾಂತರ ಜನರು ಉದ್ಯೋಗಕ್ಕಾಗಿ ಬಂದು ನೆಲಸುತ್ತಿದ್ದಾರೆ. ಈ ಸಂದರ್ಭದಲ್ಲಿ ಕೇವಲ ಕಾನೂನು ಅಥವಾ ಹೋರಾಟಗಳಿಂದ ಮಾತ್ರ ಕನ್ನಡ ಉಳಿಯಲು ಸಾಧ್ಯವಿಲ್ಲ; ಪ್ರತಿಯೊಬ್ಬ ವ್ಯಕ್ತಿಯೂ ಕನ್ನಡ ಓದಲು, ಬರೆಯಲು ಹಾಗೂ ಮಾತನಾಡಲು ಸಶಕ್ತನಾದಾಗ ಮಾತ್ರ ಕನ್ನಡ ಶಾಶ್ವತವಾಗಿ ಉಳಿಯಲು ಸಾಧ್ಯ.